網紅的藏寶箱女人一生，只為搵一個住私樓嘅男人（下）
上集：http://bit.ly/3r9vnsz
我意識到，好多香港嘅男士，都需要一層私樓嘅外殼，我忽然間發現咗一條財路。
然後，我先從身邊嘅朋友入手，以friend搭friend嘅模式，推廣呢個「日租私樓」服務。
我負責將單位佈置得有人氣啲，然後將鎖匙借畀對方，事後再執埋屋，一日就收幾千蚊。
唔好覺得貴，你平時追一個女仔，幾千蚊追唔追到？
就算你用幾千蚊請佢食一餐飯、買嘢佢，分分鐘佢都當你係兵，依然覺得你「冇上進心」。
但幾千蚊就可以獲得「住私樓」嘅身份，競爭力真係唔止上升咗一籌。
你可能會問，咁大家長期發展，真係談婚論嫁咁點算？遲早都會露底。
問題就在於「遲」定「早」，明明遲早都會露底，但女仔初初約會，咪一樣化晒妝、個胸墊埋pad。
而且，現代人拍咁多次拖，有幾可談婚論嫁，分分鐘拍三、五次拖，都去唔到嗰個地步。
我嘅生意蒸蒸日上，漸漸地，我喺討論區開埋Post，公開招攬客人。
我當然冇話我係地產經紀，只係話我自己有私樓單位，可以借畀各位巴打。
我甚至同相熟嘅業主溝通好，我負責營運，同業主分成，名正言順咁利用佢哋個單位。
業主未搵到合適嘅買家或者租客，又可以賺住錢先，佢哋都好樂意。
咁樣一來，我喺單位內嘅佈置，就唔駛日日都收番。
我呢份「freelance」嘅人工，開始多過我份正職。
我沾沾自喜，對詩詩都更加豪氣。
直到有一日，詩詩突然打電話畀我，講咗一個現崇山嘅地址。
我諗咗幾秒，先記得係我嘅「地址」，即係我嗰陣帶詩詩「返屋企」嘅單位。
我問：「bb，做咩冇啦啦提起我屋企地址？」
「你屋企？定你租番嚟嘅臨時屋企啊？」詩詩冷笑一聲。
詩詩講咗好耐，我先知發生咩事。
原來，詩詩有個好姐妹識咗個新男友，新男友話自己住現崇山，詩詩就話：「咁啱嘅，我男朋友都係，你男朋友住邊層？」
兩個人傾吓傾吓，就發現男朋友係住同一個單位，最弊嘅係，我哋都話自己係獨生子。
唉，之前現崇山嗰個單位仲未賣得出，我又同個業主講掂數，咪佈置得靚一靚，成日租畀人。
點知上得山多終遇虎，呢次嘅「獵物」會係詩詩嘅姐妹。
事到如今，喺詩詩嘅質問下，我只好講出真相，講晒事情嘅始末出嚟。
詩詩好嬲，我以為佢一定會同我分手。
畢竟，佢初初同我一齊，都係因為我住私樓之嘛。
點知，過咗一排，詩詩原諒咗我。
佢話覺得我個人好有頭腦，居然諗到呢個「日租私樓」嘅方法。
佢相信，我雖然依加住公屋，但以我嘅頭腦同上進心，一定可以有美好嘅將來。
只不過，自此之後，詩詩同我出街，食嘅嘢、買嘅嘢都比以前更加貴。
到底詩詩肯繼續同我一齊，係愛我，定係見我份人工多咗幾倍？
我都唔知，總之我覺得好感動。
原來「條條大道通羅馬」，要得到拜金嘅女人，唔一定要住私樓，
你人工好高都得㗎！
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #女人一生只為搵一個住私樓嘅男人
Search